當睇法跟年輕一代不同，就覺自己變老。

Youtube 有條 UNIQLO x JW ANDERSON 新季衫褲推介影片。條片是位大隻仔製作。此兄台講到係威係勢指點江山咁款，但睇佢身型 fit 到漏油，大大舊溝死仔，着上 UNIQLO x JW ANDERSON 衫褲帶點滑稽味道。莫非家陣咁樣的片都有人追看？雖則內容有可取處，但睇到人好尷尬。

另一事。睇連登話林家謙天上有地下無，香港新希望。搞到小弟心癢癢有反應，去搵歌曲聽下。真心，聽後不覺林家謙嘅歌有乜特別，只係較有質素流行曲。

再之前嘅《新喜剧之王》，果時覺套戲十分唔錯，以商業片來說絕唔失禮。但不知點解，《新喜剧之王》又被踩到體無完膚。套戲真咁差？

日積月累，我開始信心動搖。是我品味出錯？還係世界變了？唯一可做，係返屋企摺埋出少句聲。

我同來自人間嘅朋友常講，依家學識收聲好緊要。