有人問我我就會講但是無人來。睇過 Sandy Choi 同 Jonathan Mak 嘅訪問，我都想唔知醜地講兩句。

因為我覺得如果去睇 HKDI 個 Henry Steiner 展覽，只係抱住膜拜下大師、見識一下人人都話佢係好嘢、打打卡嘅心態，而冇穿越表面視覺觀感去了解一下背後個方法，學習 Steiner 係點樣諗嘢、點樣做設計、點樣觀察四周、點樣培養內涵，咁就有點兒浪費。

石漢瑞對今日設計師有何影響？
老實，我唔太覺得 Steiner 對今日本地設計師有乜嘢太大嘅影響。換句話講，佢用嘅設計方法其實都唔太受年輕一輩嘅設計人推崇。今時今日唔少設計學生都覺得設計係為咗表達自己，或透過客戶嘅問題實踐自己理想嗰套設計風格。建立一個獨特嘅個人形象揚名立萬比解決設計問題本身重要。更有人會以「宏揚乜乜文化」為設計綱領，先有答案再尋找問題嘅本末倒置，應該唔係受 Steiner 影響啩！？我未聽過石老話要宏揚奧地利文化而去設計呢。

係嘅，跟足 Steiner 嗰套成為「Steiner 二世」（如果得的話）係冇乜意思。我相信 Steiner 本人都唔會覺得呢類咁 Chinese 嘅徒弟繼承師傅 dogma 係 work。

「石漢瑞的圖語世界」策展人 Amy Chan 同 Keith Tam 將展覽分為「象徵 Symbols、對比 Contrast、說書 Stories、借用 Appropriation、系統 Systems」去展示作品，係有教育意義嘅。因為呢啲手法，絕非甚麼「Henry Steiner 式設計語言」，而係非常之 universal，世界通行嘅視覺溝通技巧。正如 Sandy Choi 指出，人人都可以用 Steiner 嘅方法，冇秘技，但問題係唔係人人都做得好似 Steiner 咁優異。 設計唔係天馬行空，或等運到靠天份，或靠上網揾 reference；設計係有方法嘅。

咁石漢瑞可以對今日設計師有何影響呢？

好視乎你用乜嘢視野去學習咯。Henry Steiner 係少數受過高等教育嘅老一輩本地設計師，佢嘅學養唔係局限於美學或商業設計，而係具國際水平視野廣濶，理論與實踐兼備。單單呢點已經令唔少讀書唔成嘅設計人產生無限距離感（包括我自己）。要响「靚囉」、「唐人街設計」、「跟風抄襲」領域以外開拓歷史、藝術、文學、風俗、文化、政治、科學等等知識，放眼世界古今中外，放下無謂嘅民族自卑感、自我膨脹、個人崇拜，以概念為先（Idea-driven）去認真對待專業設計，唔係人人有呢種心志。

我唔覺得自己有生之年成就上可以見到 Steiner 尾燈，但佢的確示範咗一個好好嘅方向畀大家去參考學習。


解讀「設計98展」海報
就咁睇，多數人都會睇到「中西合璧」，西方油畫用顏色盤形狀框住再加支中國毛筆，用嚟做香港設計師協（HKDA）Design Show 1998 海報主題，剛剛「主權移交」咗一年，幾貼切吖。當年引發嘅爭議係因為個 visual 涉及裸女同毛筆筆尖直指畫中女模特兒私處，有人覺得好不雅。大家都唔係好明背後嘅意思，有人會覺得係譁眾取寵，純粹 gimmick。

Steiner 嘅設計——如 Jonathan Mak 所說——勁就勁在可以雅俗共賞，觀看者唔需要明白晒背後整個深層意義，都可以單憑表面注目同意會個訊息。但當有番咁上下文化修養，或大家探究一下，就會發現有另一層更精彩訊息。

海報中嘅油畫唔係普通嘢，係西班牙畫家 Francisco Goya（1746—1828）一幅富爭議性嘅名作《The Nude Maja》。係呀，呢幅畫嘅背景正正同 Steiner 張 poster 一樣响發表時引來滿城風雨。（因為好奇，特登上網做咗啲 research）原來 Goya 呢幅畫因為女模特兒嘅「毫不知恥」同「直視觀眾」嘅眼神，當時被視為「so indecent（猥褻）and prejudicial to public good（損害公眾利益）.」。

This work has many of the identical traditions as those depicted in Spanish nude paintings, but it expresses a clear break from these traditions in significant ways, such as the model’s bold gaze.

This work is famous for the straightforward and unashamed gaze of the model looking at the viewers.

另外，响展覽小冊子中，Steiner 有句關於嗰次海報風波嘅備註：

I’ve felt for a long time there is a genteel quality in Hong Kong design which is indirect and evades confrontation. —— Henry Steiner


知道咗呢個典故後，我覺得 Steiner 呢個借喻真係好 mean。一方面借古喻今地批判社會民智保守；另一方面暗嘲香港設計「很文雅」、「間接」、「避免敵對風氣」，客氣中一巴巴車落去揶揄同業保守兼唯唯諾諾，真係高！最最最最慘嘅係，佢呢個 statement，今時今日都仍然適用，一啲都冇過時。（難怪有唔少「大師」都麻麻地妥石老。國王新衣小孩最惹人討厭。）

講起 Goya，佢有兩幅畫相信今日大家都唔會太陌生——《The Third of May 1808》（1814）同《Saturn Devouring His Son》（1819–1823）。Steiner 對藝術史嘅認識，同勇於 provoke 嘅棱角，係「Very NOT Hong Kong」的，但值得學習。

待續… …