如果你問任何設計師：Portfolio 重唔重要？我估每一個有經驗嘅設計師都會同你講重要。你問我，我都會答你：重要… …但——係—— 唔係最重要。
Portfolio 嘅質素反映設計師嘅能力，冇乜人會有太大異議。所以令唔少人都會將 portfolio 嘅功能無限放大，久而久之人云亦云地將佢變咗好似係唯一一把尺咁。網上挑機都會問句：「攞你個 portfolio 嚟睇下！」。神化 portfolio，好處係，大家都會好努力咁建立自己嘅作品集，希望佢為自己帶來更好嘅仕途；壞處係，大家都會忽略咗其他都相同重要嘅嘢。
設計人嘅 portfolio 大致上分兩種，一種為求學，一種為求職或揾生意。兩種都係一種「曬冷」，將自己曾經做過想過嘅嘢精選地結集。
簡單嚟講，求學用嘅 portfolio，都唔需要太「專業」、太 finished，重點係要 show 到畀人知你有熱誠、勤力同潛質去探索有關設計嘅種種（如閱讀）。形式上最好廣闊多樣未定型（對於初學設計者），忌獨孤一味，raw raw 地有趣富實驗性可能比天才畫功討好（視乎乜課程吧）。至於揾食 portfolio，咁當然要表現出一定職業水平嘅技能，無論思考上或技巧上都唔可以太幼嫩，予人「都唔知佢掂唔掂」嘅感覺就大劑。最好就係配合番想揾嘅特定類型工種或公司啦（Tips：重 idea-driven 嘅公司唔會滿足於「靚囉」）。所以有時有啲較着重創意嘅公司——尤其對 fresh grad，佢哋都未必想見一啲「熟口熟面嘅專業嘢」，怪怪雞雞冇乜見過，但又 execute 得好有心思嗰啲，反而難能可貴。總括而言，portfolio 裝住好多作品，但佢本身其實都係一件作品。如何 curate，如何講故事，都要講究。
不——過——
Portfolio 只係其中一項評核設計師嘅工具。如果係唯一最重要，咁就唔需要有 interview、CV、employment history、credit check、Google search 等等程序。因為就算個 portfolio 好到識飛，個設計師本人係一條仆街，相信都未必會有人想同佢合作（Hater 們一定會話學子講緊自己）。
Interview 中，可以睇下一個人嘅眼神、談吐、禮貌、衣著、急才等等，呢啲一切都冇可能响 portfolio 中察看到，係 personal branding 要 audit 嘅嘢。如果神眼閃縮衣著錯配，說話空泛詞不達意，與 portfolio 質素不相稱，咁就令人產生懷疑喔。
CV、employment history、credit check 加 Google search 亦係評估一個 portfolio 可靠性嘅重要工具。清楚一個人嘅往績很重要。因為 portfolio 被神化，導致有啲人心術不正不擇手段地建立 portfolio。攞人哋嘅作品據為己有、參與小部份就混水摸魚當自己 in charge、credit 得唔清唔楚誤導他人、吹虛往績搏冇人去 fact-check、拋名人上司姓名攀附一番、抄襲拿來就更加唔駛多講。如果個人唔老實，作品都可以好唔 honest 呢。
因此，如果業界大部分人都只睇表面，盲目信奉「作品就是一切」，咁，慢慢就會越來越多表面好似才俊，但內裏失德、毫無專業操守、敗壞風氣嘅仆街冚家剷响行內出沒。「Honesty」就漸漸變咗忠忠直直終須乞食嘅代名詞。
Brand is reputation。個人名聲就係佢嘅品牌。品牌建立得好，唔係咁容易被抹黑兩嘢就擊到；反之，品牌建立响水份極高嘅幻象上，日子久了就可證明一切。
曾經聽人講過，揀學生好，揀同事好，揀合作伙伴都好，personality 有時比好多 qualifications 都重要。成日話學做設計其實即係學做人，都咪話冇道理。🙂
