幾個禮拜前去戲院睇戲，英國開場前超長嘅廣告同電影預告通常我都唔會錯過（我係 miss 一分鐘寜願睇下場嗰種人），因為周不時都有好嘢。驚喜當中，最有印象係呢條 Transport for London（TfL）嘅廣告——《Welcome Back London》[1]，邊睇邊會心微笑。不嬲我都好 idea-driven 嘅設計，帶點幽默感就更佳，英國真係到處都有。

經過去年嘅 lockdown，聽朋友講堅係苦不堪言，所以疫情稍為緩和（其實係「live with virus」），大家就急不及待過番正常生活。基本上係同香港完全相反，兩種抗疫政策，兩個世界。响呢個背景下睇 TfL 呢條片，倍覺窩心。

地鐵，近年响香港人心目中嘅印象，已經今非昔比（721 831… …）。記得較早前 Hong Kong Graphic Archive 開幕禮中，嘉賓之一又一山人 aka 黄炳培 aka Stanley Wong aka 「齊心/無言/紅白藍設計師」分享過佢遠古之前做嘅港英年代地下鐵路電視廣告。佢自滿地慨嘆話嗰陣時嘅創作同與客戶關係都十分美好 [2]。的確，與今日好多嘢相比，過去係值得懷緬嘅。

設計≠Design，地鐵≠Tube，的士≠London Black Cab，我明有好多嘢都冇得直接比較，但有啲衝擊真係無啦啦响腦海浮現。當香港設計「大師」回望八九十年代嘅廣告，人哋2021年播緊嘅片係咁，idea、 execution連埋整個 context 睇，真係萬分唏噓。Share 《Welcome Back London》條 YouTube 畀香港行家朋友睇，佢話：Sure never will happen (in Hong Kong)。大家都覺得 idea-driven 嘅設計，唔係香港設計師杯茶，又或者唔係香港大眾杯茶，唔知雞先定蛋先。我估，或許呢個就係英國設計教育同行業與香港最大嘅差別之一吧。遲啲有機會再講多啲。

條片唔講嘞，大家自己 J 啦。去片！

如果你問任何設計師：Portfolio 重唔重要？我估每一個有經驗嘅設計師都會同你講重要。你問我，我都會答你：重要… …但——係—— 唔係最重要。

Portfolio 嘅質素反映設計師嘅能力，冇乜人會有太大異議。所以令唔少人都會將 portfolio 嘅功能無限放大，久而久之人云亦云地將佢變咗好似係唯一一把尺咁。網上挑機都會問句：「攞你個 portfolio 嚟睇下！」。神化 portfolio，好處係，大家都會好努力咁建立自己嘅作品集，希望佢為自己帶來更好嘅仕途；壞處係，大家都會忽略咗其他都相同重要嘅嘢。

設計人嘅 portfolio 大致上分兩種，一種為求學，一種為求職或揾生意。兩種都係一種「曬冷」，將自己曾經做過想過嘅嘢精選地結集。

簡單嚟講，求學用嘅 portfolio，都唔需要太「專業」、太 finished，重點係要 show 到畀人知你有熱誠、勤力同潛質去探索有關設計嘅種種（如閱讀）。形式上最好廣闊多樣未定型（對於初學設計者），忌獨孤一味，raw raw 地有趣富實驗性可能比天才畫功討好（視乎乜課程吧）。至於揾食 portfolio，咁當然要表現出一定職業水平嘅技能，無論思考上或技巧上都唔可以太幼嫩，予人「都唔知佢掂唔掂」嘅感覺就大劑。最好就係配合番想揾嘅特定類型工種或公司啦（Tips：重 idea-driven 嘅公司唔會滿足於「靚囉」）。所以有時有啲較着重創意嘅公司——尤其對 fresh grad，佢哋都未必想見一啲「熟口熟面嘅專業嘢」，怪怪雞雞冇乜見過，但又 execute 得好有心思嗰啲，反而難能可貴。總括而言，portfolio 裝住好多作品，但佢本身其實都係一件作品。如何 curate，如何講故事，都要講究。

不——過——

Portfolio 只係其中一項評核設計師嘅工具。如果係唯一最重要，咁就唔需要有 interview、CV、employment history、credit check、Google search 等等程序。因為就算個 portfolio 好到識飛，個設計師本人係一條仆街，相信都未必會有人想同佢合作（Hater 們一定會話學子講緊自己）。

Interview 中，可以睇下一個人嘅眼神、談吐、禮貌、衣著、急才等等，呢啲一切都冇可能响 portfolio 中察看到，係 personal branding 要 audit 嘅嘢。如果神眼閃縮衣著錯配，說話空泛詞不達意，與 portfolio 質素不相稱，咁就令人產生懷疑喔。

CV、employment history、credit check 加 Google search 亦係評估一個 portfolio 可靠性嘅重要工具。清楚一個人嘅往績很重要。因為 portfolio 被神化，導致有啲人心術不正不擇手段地建立 portfolio。攞人哋嘅作品據為己有、參與小部份就混水摸魚當自己 in charge、credit 得唔清唔楚誤導他人、吹虛往績搏冇人去 fact-check、拋名人上司姓名攀附一番、抄襲拿來就更加唔駛多講。如果個人唔老實，作品都可以好唔 honest 呢。

因此，如果業界大部分人都只睇表面，盲目信奉「作品就是一切」，咁，慢慢就會越來越多表面好似才俊，但內裏失德、毫無專業操守、敗壞風氣嘅仆街冚家剷响行內出沒。「Honesty」就漸漸變咗忠忠直直終須乞食嘅代名詞。

Brand is reputation。個人名聲就係佢嘅品牌。品牌建立得好，唔係咁容易被抹黑兩嘢就擊到；反之，品牌建立响水份極高嘅幻象上，日子久了就可證明一切。

曾經聽人講過，揀學生好，揀同事好，揀合作伙伴都好，personality 有時比好多 qualifications 都重要。成日話學做設計其實即係學做人，都咪話冇道理。🙂

設計貿易就係絕對嘅惡? 原創設計嘅價值又係乜?

眼看學子文早前提到設計貿易嘅現象，部份讀者反映學子負皮過大而毫無事處，更甚有睇唔過眼嘅台灣讀者以低能兒嚟反擊學子人格，我只可以話學子真係”壞過凱婷”。不過有趣嘅係，學子文已吸納左一批新嘅台灣觀眾，負皮影響力果然唔可以睇小。

實話實說，學子嘅語重深長係多餘 But Nice To Have。秉承著”講講講，做啦柒頭的”XXX設計教室”原則，我亦想以實例分享嚟回應一下文中提到”鼓勵大家冒險嘗試開拓新風格新想法，去了解歐美日為何往往走在時代尖端”嘅說法。接著分享都以 Branding 案例為主，除左係香港平時流傳嘅"乜品牌醫生論"、”乜品牌非只係 Logo 設計論”、定”乜品牌都係放隻字體就叫Logo論”等等之外，我地又可以點樣以更多嘅角度嚟學習 Branding 係乜乜，去了解一下原創同品牌之間嘅關係。

原創固然值得尊敬和支持，但水平未必有所保證亦喺現實，原創設計相對設計貿易無論難度、風險以及投入成本都上升唔少。品牌嘅主理人對原創嘅理解至關重要，基本會左右品牌嘅發展上限。品牌通過原創設計嘅投入，實際上又可以得到點樣嘅價值呢?

強如設計強國——日本，於 20-50s 年代嘅工業設計就充滿著”非原創”嘅設計貿易現象，”Made in Japan”名聲最初只可以話係麻麻地，原創設計嘅實力偏弱。1958 年，當時日本外務大臣藤山愛一郎訪問 London 時，被記者質問日本品牌山寨嘅現狀後，在海外引起左極大嘅輿論同壓力。自此日本嘅工業設計走向原創開發之路，並出產左日後日本經典嘅原創設計就無需我再多講一二。

以下兩個”設計貿易”嘅經典案例，以作參考。

從 1950s 開始，只有少數嘅日本品牌喺最初就一直專注於原創設計嘅產品開發。其中之一就喺Sony，包括 1955 年嘅 TR-55, 1979 年嘅Walkman, 1985 年嘅 CCD-V8，再到今次會同大家多分享嘅 1988 年 The First Sony 系列之作。


The First Sony 項目出發點本身就充滿著實驗性嘅原創精神。產品系列以RGB色系機身為主，結合渾圓嘅線條感，創造左極具玩味嘅原創設計美學，既包含一貫 Sony 高技術在內，售價亦唔喺只係玩具級消費(就係貴!!) 。Sony 當年對 The First Sony 系列嘅寄望喺 “兒童喺首次體驗影音產品時，希望可以激發起佢地對科學嘅興趣”，系列設備之間仲可以通過連接而擴展更多功能。

時至今日，The First Sony 仍然係音樂發燒友嘅收藏好物，My First Sony 多功能卡式機，既可播放及錄製卡式帶，亦加入了電子鼓嘅功能，能轉換成模仿動物叫聲嘅聲效，通過黃色按鈕可將鼓聲錄製到卡式帶之中。

The First Sony 作為 Sony 原創設計嘅一次重大突破，為 Sony 產品家族注入左嶄新嘅”品牌色彩組合元素”，從 Walkman, Personal Computer, Playstation Controller 等經典設計之中，我們都持續地可以見到佢地嘅身影。

依種“色彩印象”除左承擔左美學和功能作用之外，其背後亦代表著Sony品牌視覺文化嘅哲學觀 —— 喺歷代產品嘅更新過程中，設計既有其恆久不變之處，亦有其隨時代而變的特點，而品牌色彩就如同一種專屬於Sony嘅視覺印記，為用戶創造出”可被識別與感知”嘅定義。

The First Sony 作為 Sony 原創設計嘅一次嘗試，其價值亦係依到。品牌與色彩之間嘅關係，其實唔係淨係就咁配下色咁簡單，色彩既可以係帶俾品牌 Value Added 嘅一種設計元素，甚至成為品牌文化中嘅一種”視覺資產”呢。日後再同大家用更多行業實例黎分享一下囉。

補充: 
設計貿易非絕對嘅惡，只係相對原創設計黎講，其價值創造會較弱。
真係要講壞嘅，我始終先諗起凱婷/左膠/學子。:p

待續......

「設計貿易」又名「創意貿易」，係指設計商人持續地將外地好設計或創意，移植到自己作品中作販賣或推廣用途。期間冇獲得原作者任何授權或列明參考出處，直接或稍作修改從海外入口挪用。設計貿易玩家通常會物色一啲比較偏門新穎或廣為人知嘅優質創作人作品或風格，目的係拿取別人成果自肥。嚴格嚟講，佢哋唔算真真正正做設計，而係從事貿易勾當。

設計有好多方法，各門各派，百貨百客。人人能力同取向各異，就平面設計嚟講，學同做都人人唔同，有概念向（Idea-driven）、視覺向（Visual-driven）、資訊向（Data-driven）等等。有啲人會研究歷史、文化、理論、基本元素、基礎法則、用家需要、傳意效率等等，去從初階開始建構思維、知識同技術，繼而以實踐累積經驗，錯誤中一步一步成長，向專業水平邁進。另一邊廂，有另一啲人則比較精叻醒目，會計算成本效益，嘗試將手上資源（包括有限才能、智商）用盡，將學習成本盡量濃縮，知識技術吸取傾向即時實用，並以實踐利益最大化為綱領，務求循捷徑做出美侖美奐嘅「靚靚『創作』」。

由於唔讀書（可以與文憑學歷無關），理論同知識都冇乜基礎，圓、方、角、三原色都未識分，久而久之導致思維能力有限，面對問題時冇辦法想出一個或以上解決方案。加上，渴望作品能夠達到人人讚好嘅專業水平，鑽研硬技術（software）與及一味留意潮流資訊（Behance、Pinterest、Vimeo），變成冇太多選擇下嘅唯一揾食（成名）出路。

記得初學設計時，冇 Internet，設計人接收藝術設計相關嘅資訊基本上都靠書本、雜誌，或少量媒體傳訊——電台、電視、紀錄片。所以當年設計書店——競成、辰衝、Page One、書得起——都係大家知識進補同「提取靈感」嘅泉源。今日呢啲書店全部都不敵互聯網大時代而相繼結業。

潮流雜誌、設計月刊、藝術通訊、設計年鑑、各大設計獎項作品集，都係當年好多廣告人同設計人嘅「啞老師」。唔少做潮嘢型嘢嘅 agency，工作枱上都有一幢幢嘅「參考書」。Brainstorming 同揭書，基本上係好多「創作人」嘅「professional practice」。時至今日，互聯網無窮無盡嘅內容，成為咗唔少要依賴 reference 先識做設計嘅人嘅福音。

間中，網絡都會傳來一啲「好相似設計」，疑似係「設計貿易」嘅商品。可能有人會話：唓～！日光之下無新事，撞橋有幾奇呀？！係嘅，世界之大無奇不有，但有時都好難相信大世界中嘅或然率原來可以咁巧合。兩個設計師，一西一東，同期嘅作品一先一後可以如此相似，係自然現象，定抑或係經貿常態呢？留待大家去思考一下。🙂

台灣新一代 vs 匈牙利新一代
平心而論，如果係走潮流風格向嘅設計師，參考一下外國例子，啟發而再創作，都可以話無可厚非。（揾食啫，唔駛下下原創嘛？）但當大家談及新一代設計師嘅將來，我就反而會鼓勵大家冒險嘗試開拓新風格新想法，去了解歐美日為何往往走在時代尖端，中港台則好似永遠學舌跟風。難道我哋冇實驗嘅精神、創新嘅自信？

Image source:
http://www.10inc.jp/sizubi/
https://www.facebook.com/innoisestudio
http://daikoku.ndc.co.jp/work/peninsula/
https://www.facebook.com/vianorthpoint
https://www.behance.net/gallery/102816579/Louisiana-Museum-of-Modern-Arts-rebranding-concept
https://today.line.me/tw/v2/article/m7gpgE
https://www.instagram.com/visny.ai/
https://www.instagram.com/aaronnieh/


老實，我對品牌成日開口埋口宣揚乜偉大價值嗤之以鼻。講咁多，無非都係錢字。好似宣揚肥婆是種自信、叫人買衫都要環保一樣，有無咁 on九？家陣幾多人係唔夠衫着？衫太多就有之。唔幫襯就最環保。

之但係今次 Dove 的新 campaign 係要支持，事關小弟一直認為 social media 害人不淺，賤格過共產黨，衰過外星人強姦少婦。社交媒體搞到香港女子日日著條長底褲出街曬晒鮑、再唔係就齊齊做電子雞賣大包，成何體統？！

所以即使今次 Dove 其實一樣為個錢字，小弟，觀鳥家，都會為佢搖旗吶喊大力支持。